miércoles, marzo 17, 2010

Marc Simon: «Principiar pela incineración ye principiar pel final, ye una contradicción»

Fuente: http://www.lesnoticies.com

Fecha: 16/03/2010 a las 13:54:29

«Principiar un plan de residuos pela incineración ye principiar pel final, nun tien xacíu y ye una contradicción». Esta ye una de les declaraciones que fixo Joan Marc Simon, espertu internacional en xestión de residuos y Coordinador n'Europa de l'Alianza Global p'Alternatives a la Incineración, na presentación de l'Alternativa Sostenible a la Xestión de los Residuos d'Orixe Domiciliariu qu'acaba de presentar el Consorciu Cívicu d'Asturies. Joan Marc Simon, va dar la charla Incineración de residuos nel sieglu XXI ¿Solución o problema? esti martes 16 de marzu nel Edificiu Históricu de la Universidá, a les 19 hores.

El Coordinador n'Europa de l'Alianza Global p'Alternatives a la Incineración esplicó qu'una de les claves na xestión de residuos ye la so xerarquización. Nesta escala, l'orde de tratamientu de los residuos empieza pela prevención y sigue pela reutilización, el reciclaxe, el compostaxe, la valorización enerxética d'alta eficiencia y el depósitu en vertederu controláu de la fracción restu non aprovechable. Ello ye que la última de les fases ye la incineración, tal como remarcó Marc Simon: «Apostar pola incineración nun tien xacíu nin dende'l puntu de vista medioambiental, nin económicu nin pa la salú».

Ún de los puntos nos qu'incidió l'espertu en xestión de residuos foi na rentabilidá económica de l'alternativa del reciclaxe y la reutilización: «Da más beneficios tol procesu de reciclaxe, reutilización y compostaxe, qu'inclusive tien aplicaciones pa l'agricultura ecolóxica. Ye dalgo que funciona a nivel económicu, llaboral, al crear diez veces más empléu que la incineración, y medioambiental, al facer un territoriu más atractivu y más modernu». Nesti sen, Simon señaló que frente a los 80 puestos de trabayu que pue xenerar la incineradora, la industria del reciclaxe pue xenerar unos 800 empleos.

Otru aspectu qu'hai que tener en cuenta ye que la incineración pue impidir que se cumplan los oxetivos de la Unión Europea en reciclaxe, lo que podía llevar a Asturies a entrar nuna «espiral de multes», alertó'l Coordinador de l'Alianza Global p'Alternatives a la Incineración.

No hay comentarios: